Charta qua Stephanus, comes Burgundiæ et dominus de Treva, dat monachis Sancti Marcelli Cabilonensis centum solidos annuatim de censu de Treva.
Sicut illi qui ecclesiam Dei destruunt infernali dampnationis pena, sic qui hedificant celesti remunerantur gloria. Quapropter ego Stephanus comes Burgundie et dominus de Treva, laudante uxore mea
filia ducis Lotharingie, dono et concedo annuatim centum solidos, qui de censu de Treva in festo Purificationis beate Marie mihi solvebantur, beato Marcello martiri Cabilonensi et monachis ejus in perpetuum persolvendos, tali scilicet conditione, ut de ista pecunia census, videlicet equus albus oneratus piscibus, qui de prefato castro prefato martiri debebatur, solvatur, et singulis annis reddatur. Hoc autem donum factum est domno Pontio priori, in villa de Fructiniaco, die lunis, in presentia multorum testium, virorum nobilium et religiosorum, abbatis de Caritate, abbatis de Bellavalle, Hugonis prioris Floriaci, Stephani prioris de Treva, Stephani Capioli monachi, Ebrardi archidiaconi Bisuntinensis, Guidonis abbatis militis de Durnec et Hugonis filii ejus, Odonis Campaniensis, Odonis de Dona Petra, Guidonis de Marchia, Theobaldi et Milonis fratrum et Theobaldi, nepotis eorum, Richardi et Gafridi de Rasia, Girardi, villici de Treva et Roberti de Flageiaco, qui ei noviter successerat.