Sacrosanctę Dei ecclesię Cluniensi quę est constructa in honore summorum apostolorum Petri et Pauli, quę est sita in episcopatu Matisconensi, ubi dunnus Hugo abba magis videtur prodesse quam preesse, et fratribus ibidem sub ejus regimine Deo servientibus, [presentibus et futuris,] dono ego Richoara, uxor Wichardi de Bellojoco, ipsi loco jam dicto, pro remedio animę meę et viri mei et filiorum ac filiarum mearum, necnon pro omnibus parentibus meis vivis atque defunctis mortuis, ecclesiam de villa Vitriaco, quę est sita in episcopatu Augustudunensi, cum omnibus quę ad ipsam ecclesiam pertinent, scilicet cum primitiis, decimis, sepultura, cimiterio, presbiteratu, et quicquid ad presens habet vel inantea habere debet ipsa ecclesia. Feci autem hanc donationem in vita mea, et maxime post mortem meam, laudantibus viro meo Wichardo et filiis meis Humberto et Dalmatio, et filiabus meis cunctisque parentibus meis laudantibus et minime contradicentibus, ut possimus partem habere omnium bonorum quę fiunt in supradicto loco et in omnibus locis illi pertinentibus. Accepimus tamen unum equum valde bonum a fratribus supradicti monasterii ego et vir meus. Si quis vero ex parentibus meis atque heredibus vel aliis hominibus in ipsa ecclesia calumpniam inferre voluerit vel ibi aliquid requisierit, non valeat, sed sit maledictus et excommunicatus [atque anathematizatus]; et exsurgat terra et deglutiat eum sicut deglutivit Datan et Abiron, descendatque in profundum inferni vivens, nisi satisfactionem fecerit. S. Richoarę, quę hoc donum fecit et rogavit firmare. S. Wichardi, viri sui et Dalmatii et Humberti filiorum eorum. S. Wichardi de Marciaco. S. Wichardi de Monte Merulo. S. Lanberti Discalciati. Post mortem vero supradictę feminę, Lebaldus de Igonia, gener ejus, fecit calumpniam fratribus Cluniacensibus de ipsa ecclesia. Tandem vero accepit C solidos Pictavensis monetę ab ipsis supradictis fratribus, laudavitque donationem supradictam, atque [cartam] firmavit. S. Lebaldi. Item eadem femina, quę hanc donationem fecit, bonas pelles precio C solidorum a Guigone monacho et decano de Masilias propter eandem donationem accepit.