Textus
|
PRIVILEGIUM INNOCENTII PAPÆ II. ad Petrum Venerabilem, quem investit de novo de Abbatia sancti Bertini, mandans Monachis ejusdem ut ei pareant. |
XCVII. Ad Petrum Venerabilem abbatem Cluniacensem. - Illum investit
de novo de abbatia S. Bertini, mandans monachis eiusdem ut ei
pareant. |
|
INNOCENTIUS Episcopus, servus servorum Dei, dilecto filio
Petro Cluniacensi Abbati, salutem & Apostolicam benedictionem.
Canonum præcepta nos instruunt, ut in exequendis negotiis nihil
præproperè, nihil extraordinariè committamus. Tua siquidem dilectio
nuper Remis in præsentia fratrum nostrorum Archiepiscoporum,
Episcoporum, & aliorum Religiosorum virorum, qui nobiscum eò
convenerant, ut Abbatiam sancti Bertini à prædecessoribus nostris
Romanis Pontificibus Monasterio Cluniacensi commissam, & eorum
privilegiis roboratam tibi restitueremus, instantius postulavit.
Cæterùm nos ex deliberato eorundem fratrum nostrorum consilio ipsius
loci Monachis præteritam Epiphaniæ solemnitatem inducias concessimus,
ut videlicet tunc ad nostram venirent præsentiam tibi de tuis
querimoniis respondere parati. Ipsi verò, elapso eo termino, nec
venerunt, nec miserunt responsales: sed duos Monachos ex parte fratrum
nostrorum R. Archiepiscopi, & N. Morinensis Episcopi, ac dilecti
filii nostri T. illustris Flandrensium Comitis, longiores pacis
postulantes inducias direxerunt. Nos autem omnem eis occasionem
auferre volentes, ipsos usque ad præteritam mediam quadragesimam
sustinuimus, qui nimirum nec etiam tunc venerunt, nec aliquos, qui
causam suam agerent destinarunt. Quia igitur neque nos jus strictum
urget, neque postulat æquitas, ut eis in sua contumacia perdurantibus
prolixiorem terminum concedamus: te de præfata beati Bertini Abbatia
ad reformationem Religionis prædecessorum nostrorum inhærentes
vestigiis investimus; Monachisque ejusdem Cœnobii, ut tibi, dilecte in
Domino fili Petre Abbas, humiliter pareant, & ut Abbatem juxta
dispositionem tuam & consilium eligant, per Apostolica scripta
mandamus. Datum apud Vapingum III. Kalend. Aprilis. |
INNOCENTIUS episcopus, servus servorum Dei, dilecto filio PETRO
Cluniacensi abbati, salutem et apostolicam benedictionem.
Canonum præcepta nos instruunt, ut in exsequendis negotiis nihil præpropere, nihil extraordinarie [ 135C ] committamus. Tua siquidem dilectio nuper Remis in præsentia fratrum nostrorum archiepiscoporum, episcoporum et aliorum religiosorum virorum, qui nobiscum eo convenerant, ut abbatiam Sancti Bertini a prædecessoribus nostris Romanis pontificibus monasterio Cluniacensi commissam, et eorum privilegiis roboratam, tibi restitueremus, instantius postulavit. Cæterum nos ex deliberato eorumdem fratrum nostrorum consilio, ipsius loci monachis præteritam Epiphaniæ solemnitatem inducias concessimus, ut videlicet tunc ad nostram venirent præsentiam tibi de tuis querimoniis respondere parati. Ipsi vero elapso eo termino, nec venerunt, nec miserunt responsales: sed duos monachos ex parte fratrum nostrorum R. archiepiscopo, et N. Morinensi [ 135D ] episcopo, ac dilecti filii nostri T. illustris Flandrensium comitis, longiores pacis postulantes inducias direxerunt. Nos autem omnem eis occasionem auferre volentes, ipsos usque ad præteritam mediam quadragesimam sustinuimus, qui nimirum nec etiam tunc venerunt, nec aliquos qui causam suam agerent destinarunt. Quia igitur, neque nos ius strictum urget, neque postulat æquitas, ut eis in sua contumacia perdurantibus prolixiorem terminum concedamus, te de præfata Beati Bertini abbatia ad reformationem religionis prædecessorum nostrorum inhærentes vestigiis investivimus, monachisque [ 136A ] eiusdem cœnobii, ut tibi, dilecte in Domino fili Petre abbas, humiliter pareant, et ut abbatem iuxta dispositionem tuam et consilium eligant, per apostolica scripta mandamus. Datum apud Vapingum, III Kalendas Aprilis. |
| Bullarium Cluniacense | Index paginarum | Index chronologicus Privilegiorum | Quaestio | Explicatio |
E-Mail an das Projekt "Cluny" im Institut für Frühmittelalterforschung
|
KONTAKT
Institut für Frühmittelalterforschung
|
| |
|
© 2010 Institut für Frühmittelalterforschung | ||
